चीन भ्रमणअघि प्रधानमन्त्रीले पूर्वप्रमहरुसँग छलफल गर्ने
काठमाडौँ, चैत । उत्तरी छिमेकी मुलुक जनगणतन्त्र चीनको छ दिने औपचारिक भ्रमणमा जाने तयारी गरिरहेका प्रधानमन्त्री पुष्पकमल दाहाल ‘प्रचण्ड’ ले बिहीबार पूर्वप्रधानमन्त्री एवम् चीन मामिलासम्बन्धी विज्ञहरुसँग छलफल गर्ने भएका छन्।
चीनमा प्रधानमन्त्रीले गर्ने द्विपक्षीय एवम् बहुपक्षीय भेटवार्ताका विषयमा सुझाव लिने उद्देश्यले सो छलफल गर्न लागिएको प्रधानमन्त्रीको सचिवालयले जनाएको छ। चीनको हाइनान प्रान्तको बोआओमा यही चैत १०–१३ गतेसम्म हुने एसियाको वार्षिक सम्मेलनमा भाग लिन प्रधानमन्त्री दाहाल बिहीबार राति त्यसतर्फ प्रस्थान गर्दैछन्। सो क्रममा प्रधानमन्त्रीले चिनियाँ राष्ट्रपति सी जिन पिङसँग द्विपक्षीय बैठक गर्ने कार्यक्रम छ।
सम्मेलनमा सहभागी हुने विभिन्न देशका राष्ट्र प्रमुख तथा सरकार प्रमुख र प्रतिनिधिसँग बहुपक्षीय एवम् द्विपक्षीय बैठकसमेत हुने कार्यक्रम रहेको प्रधानमन्त्रीका प्रेस सल्लाहकार गोविन्द आचार्यले जानकारी दिए। प्रधानमन्त्रीको भ्रमणका क्रममा नेपालका तर्फबाट उठाउनुपर्ने विविध विषय बुधबार साँझ बस्ने मन्त्रिपरिषद्को बैठकले तय गर्नेछ। बिहीबार बिहान ९ बजे बालुवाटारमा हुने पूर्वप्रधानमन्त्री र विज्ञको बैठकमार्फत सुझाव लिने कार्यक्रम तय भएको प्रेस सल्लाहकार आचार्यले जनाए।





0 comments
Write Down Your Responses